اعجبتني.....
ام توصي في بنتها قالت :

- ماتدخليش بين الخوت راك تطلعي برانيه .
- وردي بالك تتكلمـي بالشين والا بالملام في الفرح والا في العزي .
- وردي بالك توعـدي بنادم بشيء وانتِ فرحانه .
- وردي بـالك تردي على بنادم عزيز عليك وانتِ زعلانه .
- وعماتك قدام الناس هما الصح ولو غالطـات .
- وخالاتك لو غلطو فيك قدام الناس عادي هادوو كيف امك .
- وبوك ماتحكيش قدامه هاديكا ماهي بنت فلان وبنت فلانَه .
- وخوك احتـرميه مش تخافـي منه .
- واختك اختك يطول الزمان وتلقيهـا .
- وماتسلميـش على حد كبير وانتِ مقعمزه .
- وماتلعبيش بالمقـص .
- وماتكسريش خاطر عيـل مد يده يبي منك حاجه .
- وكل شي يطيح الا قـدر الرجاله .
- وصاحبتك تبيعي عليها روحك لو تستاهـل .
- وبنت عمك لو غلطت فيك لحم ني وعـدي .
- وبنت خالتك ماتزعليهاش لما اطيح عليك الميـانه .
- والبنت الي ماتحترم اهلها وامها وبوها ماترافقيـها .
- والبنت الي تجي وتقولك قالو عليك قوليلها مايتكلموش قدامك لو فيـك خير .
- وخالك ماتبصريش معاه الا في حدود المعـقول .
- وعمك قدام بوك ماتجبديه بالخايـب .
- وانتِ امشي صح تلقي الدنيا ماشيه في طوعـك .
- وماتمشيش غلط راهو الدنيا طرقها هلبا وتُـوهي .
- وماتجرحي حد وتقولي كنت نبصر معاك راهي البصاره بنت عم الحق .
- والي يغلط فيك ماتغلطي فيه لانه هنا يبان فرق التربيه .
- ولما تبي من حد كبير حاجه امشيله ماتنـاديه .
- وماتمديش اليبرا لحد اين كان .
- وماتقوليش انا وانا خلي الناس تجبد افعالـك .
- والي تقولك انتِ زي بنتي قوليلها انتِ زي امي مرات كلمه تجبر خاطر .
- والي ينصحك وسط الناس ماتاخدي بنصيحته .
- والي ينصحك بروحك اسمعي منه وماتقاطعي .
- والي يقولك توا يدور الزمان وتجيني قوليله على قد فعلي نبي الدنيا توريني .
دعوة من قلبك على النصائح...