الدكتور أحمد أبو النصر

‏ 

العدس اللحمة النباتى
شوف مبدأيا العدس اللى بيتعمل شوربة صفرا ده هوه هواه نفسه اللى بيتحط فى طبق الكشرى اللى بنسميه فى مصر أبو جبة بس الفرق إن العدس الأصفر مقشور متشال منه جبته اللى هيه قشرته أو غطاه بمعنى أصح الغطاء بتاعه زى أخوتنا الأزهرين كده مشهورين بالجبة والقفطان طيب يعنى دول واحد وأنا شربت فى جورجيا شوربة العدس أبو جبة وكانت رائعة بس المصريين بيعملوها ع الطريقة التركية بالعدس الأصفر أو المقشور .
طيب أيه فوايد شوربة العدس اللذيذة ؟
شوف العدس مغذى بالبروتينات زيه زى اللحمة بالظبط و ياعم عود عيالك يشربو العدس المفيد اللى بيبنى لحم و بيبنى دم وبيقوى أعصاب العيال ودماغهم بدل القرف الشعيرية سريعة التحضير دى ياناس بقا حد يسيب العسل الجميل ده وياكل شعيرية منيلة بستين نيلة ملهاش لافايدة وكلها ضرر .
المهم الفوايد والدراسات ؟

١- عاوز إيدك متترعش و الحرقان و التنميل بتاع الأعصاب يروح مش هتلاقى فى الدنيا زى العدس مليان بفيتامينات ب صديقة الأعصاب .
٢- بيبنى الدم مليان حديد و نحاس .
٣- العدس بيخليك قوى وبعضلات قوية مليان زنك اللى بيبنى هرمون الذكورة إعتبر نفسك بتشرب شوربة فواكه البحر بكل فوايدها .
٤- بيوقف الإلتهاب بالظبط كأنك خدت حباية أسبرين .
٥- دراسة على ٤٨ محظوظ أكلوهم عدس وشوربة لمدة ٨ أسابيع بحالهم أيه اللى حصل ؟ إختفى الكولسترول الضار و إنخفضت الدهون الثلاثية يالهوى أومال لو كلو معاهم بصل .
٦-ثلاث دراسات بتقولك بيخفض الضغط زيه زى الكابتوبريل الدوا المشهور الكابوتين .
٧- فيه بروتين رخم اسمه هوموسيستين زيه زى الكولسترول كده بيعمل إلتهاب فى الشرايين ومن ثم تصلبها والدكاترة الشطار بيطلبو تحليله لمرضى الشرايين التاجية و الشرايين المتصلبة المهم العدس بيقتل هذا البروتين نهائيا وبيسلك ويمسح الشريان .
٨-بقولك أيه الحامل شربها عدس ليل ونهار مليان بحمض الفوليك اللى بيمنع العيل ينزل بعيب فى الأنبوب العصبى وأنا لسه شايف النهاردة طفلة غلبانة جالها الموضوع ده عشان مامتها مكنتش مهتمية بأكل العدس أو بالأحرى حمض الفوليك .
فى النهاية دا مقتطف من فوايد شوربة العدس اللى يواظب عليه يبقى بقلب حديد و شرايين سالكة ومش متصلبة ولا فيها إرتفاع فى الضغط .
شير لغيرك شوربة العدس دى كنز ياعينى لو عليها بصل بص أنت كده معاك طبق دوا مش طبق شوربة لذيذ وشهى .
دمتم بصحة ❤️
الدكتور أحمد أبو النصر